Kabsan sa iyang kinabuhi ang usa ka ‘checker’ human nga nahulog sa pangpang nga sakay sa usa ka truck nga gikaingong nawad-an og preno. Nasayrang gikan naghatod og mga election paraphernalia ang trak human madisgrasya sa Upper Puerto, Cagayan de Oro City pasado alas 8:00 kagabii, Mayo 5, 2025.
Gawas sa usa ka indibidwal nga namatay, adunay laing duha usab ka indibidwal ang naangol sa maong insidente. Subay sa imbestigasyon, gikumpirma ni Police Chief Master Sgt. Jose Ryan Sevilleno, ang traffic investigator sa Cagayan de Oro Police Office nga nawad-an og control ang driver sa maong truck sa pag-abot sa kurbadahon ug dulhogon nga bahin sa naasoy’ng lugar,rason nga nahagbong kini sa pangpang nga bahin ug mitakilid.
Apan, bisan pa man sa mga alegasyon nga nawad-an og control driver sa truck, padayon matud pa gihapon ang gihimong imbestigasyon sa otoridad labot sa nahitabong insidente.
Ang maong mga nalambigit sa trahedya nga mga bihikulo anaa na karun sa kustodiya sa Police Station 6 Puerto Office alang sa tukmang proseso.
Samtang sa pikas bahin,hilabihan ang pagbangutan sa asawa sa biktima gumikan nagpahibalo matud pa kini nga sa ilang panimalay kini manihapon ayha pa man ang panghitabo.