Mukabat sa 5.3 milyon ka pesos ang patong sa ulo sa usa sa upat ka miyembro sa New People’s Army (NPA) nga napatay sa natigayong serye sa engkwentro batok sa militar sa bukirang bahin sa Barangay Bakingking, lungsod sa Esperanza, Agusan del Sur. Gikumpirma sa 403rd Infantry Brigade ug 4th Infantry Division nga ang napatay nga adunay dakong ganti mao si Julia Cagadas, alyas “Rheda,” ang kalihim sa North Central Mindanao Regional Committee (NCMRC) ug giilang katapusan nga taas nga lider sa walhong grupo sa Region 10. Kauban usab nga napatay sa maong operasyon silang Junie Mansiguiao alyas “Kikoy,” Gerald Basason alyas “Doydoy,” ug Rocha Mae Mirafuentes Bihag alyas “Maki,” diin narecover sa militar ang lima ka bug-at nga armas.
Atol sa gipahigayon nga press conference sa Dakbayan sa Malaybalay, gibutyag ni 403rd Brigade Commander BGen. Seigfred Tubalado nga ang pagkapatay sa maong lider, hugot na nilang gitun-an ang opisyal nga pagdeklara sa Bukidnon ug sa tibuok rehiyon nga insurgency-free sa dili pa matapos ang bulan sa Septyembre.
Samtang, gipasalig usab ni Mayor Deo Manpatilan Jr. sa Esperanza nga nagpabilin nga luwas ug malinawon ang sitwasyon sa mga residente sa maong dapit, samtang ang SOCO Caraga padayon nga nagproseso sa mga patay nga lawas alang sa pormal nga pag-ila.