Gipatin-aw sa kagamhanan sa Dakbayan sa Malaybalay nga kadto lamang mga senior citizen nga nag-edad og 70 anyos pataas ang makadawat sa lokal nga pensyon gikan sa LGU.
Sa pakighinabi sa Bombo Radyo Malaybalay, gibutyag ni Mayor Jay Warren Pabillaran nga gigahinan sa dakbayan og hangtod ₱24 milyones nga pondo ang maong pensyon alang sa 6,500 ka katigulangan. Ubos sa patakaran, makadawat og ₱300 matag bulan ang nag-edad og 70 hangtod 89 anyos, samtang ₱1,000 naman alang sa 90 anyos pataas.
Gitino sa alkalde nga dili pa mahimong iapil ang nag-edad og 60 hangtod 69 anyos tungod sa kabug-at sa kinahanglang pondo, samtang ang separate nga ₱1,000 nga nasyonal nga pensyon gikan sa DSWD igo ra usab nga ginatugyan sa LGU alang sa 3,000 ka kwalipikadong benepisyaryo.