Nasikop sa gikasang buy-bust operation ang usa ka bag-ong nailang drug personality sa Rocky Village, Barangay Poblacion, Pangantucan, Bukidnon, niadtong milabayng adlaw, mga alas 9:02 sa gabii. Base sa report gikan sa Bukidnon Police Provincial Office (BPPO), ang dinakpan giila lamang sa tago nga ngalan nga si Alyas “Nano”, 39-anyos.
Atol sa maong transaksyon, narekober gikan sa posisyon sa suspek ang duha ka sachet sa gituohang shabu nga duna’y kinatibuk-ang gibug-aton nga 5.1 gramos ug gibanabanang duna’y standard drug price nga ₱34,680.
Lakip sa mga nasakmit nga ebidensya mao ang marked money, usa ka cellphone, motorsiklo, ug uban pang mga personal nga kagamitan. Gihimo ang inventory sa mga nakumpiskang ebidensya sa dapit mismo sa operasyon diin mibarog isip mga saksi ang duha ka barangay kagawad sa Poblacion.
Sa pagkakaron, ang suspetsado anaa na sa kustodiya sa Pangantucan MPS alang sa saktong disposasyon.