Misuporta ang Motorela Federation sa Malaybalay City sa pag-aprobar sa ordinansa nga maglegalisa sa operasyon sa mga bao-bao, basta sundon ang gitakdang ruta ug mga regulasyon aron malikayan ang panagbangi sa mga drayber.
Sa pakighinabi sa Bombo Radyo Malaybalay, gibutyag ni Motorela Federation President Marlon Igpit nga sila mismo ang mitabang sa pag-andam sa resolusyon niadtong Marso 2026, nga nahimong basehan sa pag-aprobar sa ordinansa sa Sangguniang Panlungsod.
Gipatin-aw ni Igpit nga limitado lamang sa 800 ka bao-bao ang tugotan nga makakuha og permit, samtang 600 ka motorela ang gitugotan nga mag-operate sa dakbayan.
Giklaro usab niini nga gidili ang mga bao-bao sa pagpamasahero sa national highway ug pagsulod sa mga rutang gitagana alang sa motorela, tungod kay limitado lamang ang ilang operasyon sa gitakdang mga lugar.
Dugang pa niini, ipatuman ang color coding ug identification number sa matag bao-bao aron dali mailhan ang ilang asosasyon ug ruta, samtang mahimong ireport sa Traffic Management Center ang mga molapas sa regulasyon.
Sa laing bahin, gipasalig ni Igpit nga ang maong ordinansa makatabang sa paglikay sa panagbangi sa duha ka sektor ug paghatag og legal nga panginabuhian sa mga bao-bao driver nga dili makadugang sa kahuot sa trapiko sa sentro sa Malaybalay City.