Mukabat sa ₱133-million ang kinatibuk-ang halin nga natala sa mga concessionaires sa niaging selebrasyon sa Kaamulan 2026, subay sa sales monitoring report nga gipresentar sa Department of Trade & Industry (DTI)-Bukidnon.
Ang maong datos opisyal nga gipagawas atol sa Kaamulan 2026 post-evaluation meeting niadtong Mayo 29, 2026, nga gipahigayon diha sa Kaamulan Open Theater sulod sa Kaamulan Park, dakbayan sa Malaybalay, Bukidnon.
Giisip ang maong kita nga usa ka dakong dungog ug kalampusan alang sa probinsya tungod kay nagpamatuod kini sa tiunay nga pagsuporta sa mga lokal nga residente ug mga turista ngadto sa mga patigayon ug produkto sa Bukidnon, nga dako kaayong tabang sa pagpalambo sa ekonomiya, turismo, ug lokal nga panginabuhian.
Gawas sa natala nga kita, gihisgutan usab sa maong panagtigom ang mga maayong agi, mga obserbasyon, ug mga estratehiya nga angayng ipadayon, uban sa pagtuki sa mga mulo ug suliran nga nasugatan sa miaging kasaulogan aron mas mapanindot ug mapalambo pa ang selebrasyon sa mosunod nga mga katuigan.