Gipili isip flag bearer sa Pilipinas alang sa 20th Asian Games sa Aichi-Nagoya, Japan, sila Olympic boxing bronze medalist Aira Villegas ug weightlifter Albert Ian Delos Santos.
Gipahibalo ni Philippine Olympic Committee President Abraham “Bambol” Tolentino ang pagpili sa duha atol sa send-off ceremony sa Team Philippines nga gipahigayon sa Rizal Memorial Coliseum.
Si Villegas nakadaog og bronze medal sa 2024 Paris Olympics, samtang si Delos Santos bag-o lang nakakuha og tulo ka gold medal sa Asian Youth and Junior Weightlifting Championships ug nakahimo usab og mga rekord sa junior level.
Matud ni Tolentino, gipili ang duha tungod kay wala silay kompetisyon sa opening ceremony, busa dili kini makaapekto sa ilang pagpangandam ug pag-apil sa ilang mga event.
Magsugod ang 20th Asian Games sa Septiyembre 19 ug matapos sa Oktubre 4 sa Aichi-Nagoya, Japan, diin mokabat sa kapin 400 ka Filipino athletes ang mokompitensya alang sa nasud.