Gipunting sa Malacañang si Vice President Sara Duterte nga mas giuna ang personal ug politikal nga interes kaysa sa pagserbisyo sa katawhan, human sa iyang sayong pag-anunsyo sa presidential bid alang sa 2028 elections.
Sumala kang Palace Press Officer Undersecretary Claire Castro, ang maong deklarasyon nagpakita nga nakatutok na si VP Sara sa sunod nga eleksyon imbes sa kasamtangang mga responsibilidad, ilabi na samtang nag-atubang siya og tulo ka impeachment complaints sa House of Representatives.
Giklaro usab sa Palasyo nga magpadayon si Pangulong Ferdinand Marcos Jr. sa pagtrabaho alang sa nasud bisan pa kon wala’y suporta gikan sa iyang bise presidente.
Giingon nga wala magbasol ang Pangulo sa nahitabo ug magpadayon sa pagtuman sa iyang katungdanan.
Gihagit usab sa Malacañang si VP Sara nga mangayo og pasaylo sa publiko kabahin sa nagkalain-laing kontrobersiya, lakip ang isyu sa extrajudicial killings, mga pahayag nga may kalabotan sa usa ka giingong assassin, mga alegasyon sa fake news, personal nga biyahe sa gawas sa nasud, ug mga isyu sa Department of Education sama sa kontrobersiya sa vouchers, pagkaon, ug school materials.
Dugang pa, giingon sa Palasyo nga dili angay ipasa kang Pangulong Marcos ang isyu sa pagbaha, gumikan adunay mga flood control projects nga gihimo sa miaging administrasyon nga wala matud pa nakatubag sa problema.