Nagpabiling mabinantayon apan andam si Bise Presidente Sara Duterte sa posibleng pagpasaka og bag-ong impeachment complaint batok kaniya human sa Pebrero 6. Kini human ang pinal nga pagbasura sa Korte Suprema sa “motion for reconsideration” kalabot sa iyang impeachment case niadtong Huwebes, Enero 29.
Niining adlawng Biyernes, nagpaabot sa iyang dakong pasalamat ang Bise Presidente ngadto sa iyang legal team ug sa iyang mga tigpaluyo. Matod niya, ang kadaugan sa Korte Suprema usa ka lig-on nga baruganan batok sa giingon niyang “pag-abuso” o sayop nga paggamit sa Kamara sa proseso sa impeachment.
“Unang pasalamat ko, sa Diyos,” tipik sa pamahayag ni VP Sara, kinsa nag-ingon nga nakabaton siya og hustisya taliwala sa nagpadayon nga pulitikanhong isyu. Bisan pa man sa maong kadaugan, gipahayag sa Bise Presidente nga andam siya kon duna ma’y mosulay og pasaka og bag-ong reklamo sa higayon nga mahuman na ang gitakda nga “one-year ban” sa impeachment karong mosunod nga semana.
Kahinumduman nga gideklara sa Korte Suprema nga “unconstitutional” ang nangaging lakang sa Kamara batok kaniya tungod sa paglapas sa “due process” ug sa “one-year bar rule” sa Konstitusyon.