Gihangyo sa Office of the Ombudsman ang Senado nga isumite ang kopya sa CCTV footage may kalabotan sa insidente sa pagpamusil nga nahitabo niadtong Mayo 13 sulod sa Senado.
Sumala kang Ombudsman Jesus Crispin Remulla, kabahin kini sa lahi nga imbestigasyon sa iyang buhatan aron matino ang tibuok panghitabo sa maong insidente.
Giapil usab sa gihangyo ang mga video nga nakuha sa pipila ka media personnel atol sa pagkahitabo sa pagpamusil.
Naglaum si Remulla nga walay mahitabo nga cover-up sa kaso ug klaro nga mahibaloan ang tinuod nga nahitabo.
Samtang, gipahibalo usab ang 6 ka bulan nga preventive suspension batok kang Senate Acting Sergeant-at-Arms Mao Aplasca samtang nagpadayon ang imbestigasyon.
Una nang giangkon ni Aplasca nga siya ang nagpabuto og warning shot human niya matud pa makumpirma ang presensya sa mga operatiba sa National Bureau of Investigation (NBI) sa GSIS wing sa Senado.
Apan giingon ni NBI Director Melvin Matibag nga walay NBI personnel sa sulod sa Senado sa panahon sa insidente.
Nasayran usab nga si Aplasca ug Senador Ronald “Bato” dela Rosa pareho sakop sa PMA Sinagtala Class of 1986, ug si Aplasca kaniadto usa ka retiradong Police Major General sa wala pa siya ma-appoint isip Senate Sergeant-at-Arms niadtong 2025.