Balhog na karon sa selda sa kapulisan ang usa ka 33-anyos nga lalaki human niini gidunggab ang iyang kainom nga usa ka 22-anyos nga biktima sa Purok 1, Barangay Mindagat, Malitbog, Bukidnon. Base sa inisyal nga report, nahitabo ang insidente pasado alas 7:00 kagabii, Mayo 15, samtang nagkasaulog sa pista sa dapit ug nag-inom ang duha sa panimalay sa amahan-amahan sa biktima.
Sumala sa imbestigasyon, miulbo ang kalit nga panaglalis tali sa suspetsado ug biktima gumikan sa pangabugho samtang parehong hubog ang duha. Tungod sa kapungot, gihulbot sa suspetsado ang iyang kutsilyo ug kaduha gidunggab sa likod ang biktima una pa kini malampusong nadakpan sa mga mirespondeng personahe sa Malitbog Municipal Police Station pinaagi sa tabang sa usa ka barangay kagawad.Ang maong duguong komosyon sa taliwala sa kasaulogan maoy dakong hinungdan sa temporaryong kabalaka sa mga lumulupyo sa maong dapit. Samtang nag-ung-ong pa ang pagpasaka og saktong kaso batok sa suspetsado, natanggong una kini sa rehas samtang luwas ug stable na usab ang kahimtang sa biktima sulod sa Bukidnon Provincial Hospital-Malitbog.