Nagtingkagol na karon sa selda ang usa ka giingong bag-ong nailhang tigpayuhot sa illegal na droga human kini malampusong nadakpan sa gihimo nga drug buy-bust operation sa milbanyng gabii, Mayo 15, sa Purok 1, Barangay Lumbo, Valencia City. Giila sa kapulisan ang suspetsado nga si alyas “Kenit,” 22-anyos, kinsa nasakpan sa aktong pagpamaligya pinaagi sa hiniusang operasyon sa Valencia City Police Station.
Sumala sa otoridad, narekober gikan sa posisyon sa suspetsado ang tulo ka sachet sa gidudahang shabu nga dunay gibug-aton nga 5.1 gramo ug nagkantidad og kapin P34,000. Gawas sa illegal nga druga, nakumpiskar usab gikan kaniya ang buy-bust money, cellphone, coin purse, ug usa ka motorsiklo nga walay plaka nga gigamit sa iyang transaksyon.
Ang maong dinakpan mag-atubang sa kasong paglapas sa Comprehensive Dangerous Drugs Act of 2002. Sa pagkakaron, ang nahisgutang suspetsado anaa na sa kustodiya sa Valencia City Police Station alang sa hustong disposisyon.