Nagpadayon ang imbestigasyon sa mga awtoridad sa duha ka insidente sa pagbuto nga natigayun sa managlahing lugar kagabii Setyembre 13 sa Cotabato City, pipila ka oras sa wala pa ang BARMM Parliamentary Elections, nga miresulta sa pagkasamad sa usa ka indibidwal.
Sumala sa inisyal nga impormasyon gikan sa mga awtoridad, una nga insidente sa pagbuto sa Purok Amirol, MB Kalanganan, Cotabato City, diin usa ka indibidwal ang nasamdan.
Pipila lamang ka minuto ang milabay, laing pagbuto ang nahitabo sa Datu Udtog Matalam, Malagapas, Barangay Rosary Heights 10, Cotabato City, pasado alas-8:10 sa kagabii.
Dali nga mitubag ang mga personnel sa Police Station 2, kauban ang mga duty investigator nga gipangulohan ni PMAJ Tugaya Z. Alfonso, station commander, human makadawat og report gikan sa usa ka concerned citizen.
Sa inisyal nga imbestigasyon, gituohang gikan sa usa ka tapok sa basura ang ikaduhang pagbuto.
Nakaplagan usab sa lugar ang nagkatag nga mga basura.
Padayon nga gitino sa mga awtoridad ang eksaktong hinungdan sa duha ka insidente sa pagbuto ug kung adunay tawo nga responsable sa maong mga panghitabo.