Gipahigayon sa militar sa Estados Unidos ang usa ka “powerful and deadly strike” batok sa mga teroristang ISIS sa amihanan-kasadpang bahin sa Nigeria niadtong adlaw sa Pasko.
Kini human nagmando si US President Donald Trump sa pagpamomba sa mga tagoanan sa grupo nga iyang giakusahan nga naghimo og linuog nga pagpamatay sa mga Kristiyano sa maong nasod.
Sa iyang pahayag sa Truth Social, gipasidan-an ni Trump nga dili niya tugotan ang “Radical Islamic Terrorism” nga molambo ug gidayeg ang malampusong operasyon sa Department of War.
Bisan pa man sa iyang hait nga pamahayag, gikumpirma sa kagamhanan sa Nigeria nga ang maong airstrike gihimo pinaagi sa panagtambayayong sa duha ka nasod ug giaprobahan mismo ni Nigerian President Bola Tinubu human ang Nigeria mihatag og saktong intelligence report ngadto sa Amerika.
Samtang nanawagan si President Tinubu og kalinaw alang sa tanang tinuohan sa iyang mensahe sa Pasko, hugot ang bahad ni Trump nga magpadayon ang maong mga pagpamomba kung dili moundang ang pag-atake sa mga terorista.