Nabulabog ang mga personahe sa usa ka tulunghaan sa kolehiyo sa lalawigan sa Bukidnon, human makadawat og mensahe sa bomb threat ang usa ka maestro sa Pangantucan Community College niadtong miaging semana.
Sa ekslusibong pakighinabi sa Bombo radyo kang PSMS. Richard A. Memeje, Technician ug Investigator sa Bukidnon Provincial Explosive Ordnance Disposal, dako ang posibilidad nga usa ka estudyante ang nagpaluyo niini.
Gibutyag nga adunay 15 ka mga estudyante sa Criminology Department ang wala pa maka-comply sa ilang mga rekisitos alang sa thesis defense.
Tungod niini, gidudahang gihimo ang bomb threat aron ma-extend o ma-postpone ang nakatakdang defense niadtong adlawa.
Apan human sa dinaliang pag-responde sa mga otoridad, gideklarar nga “safe and clear” ang eskwelahan tungod kay negatibo ang resulta sa gihimong inspeksyon.
Sa pagkakaron, ang maong kaso gidala na sa Anti-Cybercrime Unit aron mailhan ang tinuod nga tag-iya sa account nga gigamit sa pagpanghulga pinaagi sa Facebook.
Kung mapamatud-an, ang sad-an mag-atubang og bug-at nga silot ug multa nga moabot sa 40,000 pesos base sa balaod.
Sa pagkakaron padayon pang gipanubayan sa mga otoridad ang maong insidente aron matino ang personahe luyo sa maong pagpanghulga.