Nakaangkon og seryosong samad sa tiyan ang usa ka 63-anyos nga lalaki human kini napagan sa usa ka duguong pagpamusil sa Purok 1B, Barangay Santa Cruz, lungsod sa Quezon, niadtong Mayo 3.
Sa inisyal nga imbestigasyon sa Quezon Municipal Police Station, nasayran nga nag-inom ug nagdula og bilyar ang biktima kauban ang suspek ug laing 34-anyos nga lalaki sa usa ka sari-sari store. Gikabutyag nga miulbo ang init nga lalis tali sa suspek ug sa kauban niini, apan sa dihang misulay sa pagpataliwala ang biktima aron mo-ulang, gipusil sa suspek ang iyang kaatbang apan ang senior citizen hinuon ang natandog sa bala.
Tungod sa maong insidente, daling gidala ang biktima sa Quezon Infirmary Health Center alang sa medikal nga pagtambal. Narekober sa dapit-nahitaboan ang usa ka basiyo sa kalibre .45 nga armas samtang paspas nga mikalagiw ang suspek paingon sa umahan sa tubo. Sa pagkakaron, gilusad na sa kapulisan ang usa ka hot pursuit operation aron malutos ug madakpan ang maong suspetsado.