Naangol ang tulo ka mga indibidwal human sa nahitabong vehicular accident niadtong Mayo 3, 2026, pasado alas 1:35 sa hapon sa National Highway, Purok 3, Barangay Lumbo, Valencia City, Bukidnon.
Sumala sa report, naglawig matud pa ang usa ka Motorela nga gimanehoan sa usa ka 60-anyos nga lalaki ug ang nagsunod nga MC Rusi Classic nga gimanehoan sa usa ka 21-anyos nga lalaki gikan sa sentro sa siyudad paingon sa maong barangay.
Pag-abot sa maong dapit nga nahitaboan, kalit nga niliko ang Motorela aron mohimo og U-turn hinungdan nga nadasmagan kini sa nagsunod nga motorsiklo diha sa luyong bahin.
Tungod sa kakusog sa impact, natumba ang Motorela sa kalsada samtang ang drayber sa motorsiklo ug ang 23-anyos nga angkas niini nakaangkon og mga samad sa lawas.
Ang mga biktima daling gidala sa Bukidnon Provincial Hospital sa Maramag aron matambalan.
Sa gihimong imbestigasyon, nasayran nga ang drayber sa motorsiklo nagpadagan og 55 hangtod 60 kph, butang nga nakalapas sa speed limit sa maong dapit.
Sa pagkakaron, ang drayber sa Motorela kauban ang mga sakyanan anaa na sa kustodiya sa Valencia City Police Station alang sa saktong disposisyon sa kaso.