LIBONA, BUKIDNON – Nakaangkon og samad dinunggaban ang usa ka 43-anyos nga lalaki human kini giataki sa iyang kaugalingong bayaw sa Zone 5, Barangay Gango, lungsod sa Libona, niadtong Mayo 4.
Base sa inisyal nga imbestigasyon sa Libona Municipal Police Station, nahitabo ang insidente pasado alas-11:55 sa gabii. Gikabutyag nga miadto ang 37-anyos nga suspek sa balay sa biktima diin miulbo ang ilang panaglalis nga nag-ugat sa daang panagbangi kabahin sa negosyo sa ilang pamilya. Sa kainit sa panagbingkil, kalit nga gidunggab sa suspek ang biktima gamit ang usa ka kutsilyo.
Daling gidala ang biktima sa balay-tambalanan samtang ang suspek boluntaryo usab nga nadakpan sa mga otoridad. Sa pagkakaron, gidetiner na sa Libona MPS ang suspetsado alang sa dokumentasyon ug pagpasaka og tukmang kaso samtang padayon pang gipangita ang kutsilyo nga gigamit sa krimen.