Naangol ang tulo ka indibidwal human maaksidente ang usa ka closed van truck sa Bypass Road, Purok 17, Barangay Casisang, Malaybalay City, Bukidnon pasado alas 5:40 sa hapon niadtong niadtong milabay’ng adlaw.
Base sa imbestigasyon, padulong sa sentro sa Malaybalay gikan sa Cagayan de Oro City ang puti nga Shacman closed van truck nga kargado og ceramic tiles dihang naguba ang preno samtang nag-agi sa paubos nga dalan.
Tungod niini, nawad-an og kontrol ang 39-anyos nga drayber ug misangko ang truck sa konkretong perimeter fence ug usa ka balay.
Naangol ang drayber, iyang truck helper ug usa ka 55-anyos nga babaye nga residente sa maong dapit.
Gidala sa mga responder sa BPMC ang tulo alang sa medikal nga pag-atiman. Samtang, temporaryong gibantayan ang truck sa lugar diin gihulat ang towing ug clearing operations.