Patay ang giila nga Top 1 Most Wanted Person sa Region 10 human misukol sa kapulisan atol sa operasyon sa Barangay Notongan, Nunungan, Lanao del Norte, pasado alas 5:30 sa buntag niadtong milabay’ng adlaw.
Gikumpirma sa tigpamaba sa buhatan sa Police Regional Office 10 nga si PMaj. Joann Navarro ang maong insidente diin matud pa usa ka delikadong operasyon gumikan gikaingong miyembro sa gun-for-hire ug suppoerter sa Maute Group ang napatay nga suspetsado.
Giila ang suspek sa alyas nga “Palos” o “Onday,” nga gikatakdang dakpon pinaagi sa pito ka warrant of arrest nga giisyu sa Regional Trial Court Branch 21 sa Kapatagan, Lanao del Norte.
Naglangkob ang mga kaso niini sa tulo ka murder, duha ka attempted murder, usa ka arson ug paglapas sa Republic Act 10591 o Comprehensive Firearms and Ammunition Regulation Act diin walay girekomendang piyansa alang sa tulo ka kasng murder.
Misangko sa armadong engkuwentro ang operasyon nga gihiusa sa nagkalainlaing yunit sa kapulisan ug National Intelligence Coordinating Agency (NICA) Region 10, diin usa ka sakop sa kapulisan ang namatay samtang usa pa ang angol.
Narekober usab sa lugar ang usa ka M16A1 rifle, lima ka steel magazine, 124 ka bala, magazine pouch, bandolier ug usa ka hand grenade. Padayon usab ang hot pursuit operation batok sa giingong mga kauban sa suspek nga nagpabilin sa maong lugar.
Gikumpirma usa sa opisyal ang pagkamatay sa target apan subo pamalandungon nga lakip usab sa nakabsan sa kinabuhi ang usa ka pulis ug pagkaangol sa laing usa.

