Gipalabang na sa ikaduhang pagbasa
Gipalabang na sa ikaduhang pagbasa sa Sangguniang Panlungsod sa Malaybalay ang gisugyot nga ordinansa nga nagtumong sa paghatag og Job Order o JO status sa mga kwalipikadong Purok Chairman sa siyudad.
Giduso ni City Councilor Brian Nelson Flores ang maong lakang aron mahatagan og pormal nga kahimtang ug hustong bayad ang mga Purok Chairman nga dugay nang nagtabang sa pagpatuman ug paghatod sa mga serbisyo sa gobyerno ngadto sa mga komunidad.
Ubos sa gisugyot nga ordinansa, ang City Mayor nga si Jay Warren R. Pabillaran ang hatagan og otoridad sa pag-appoint sa mga kwalipikadong Purok Chairman isip JO. Apan kinahanglan una silang i-endorso sa tagsa-tagsa nilang Barangay Kapitan isip bahin sa proseso sa pagpili.
Human sa serye sa deliberasyon ug pipila ka pag-usab sa mga probisyon, giuyonan sa konseho ang lakang sa ikaduhang pagbasa. Gilauman nga ipasa kini sa ikatulong pagbasa atol sa regular nga sesyon sa konseho sunod semana.
Gidugang pa ni konsehal Flores, tumong sa maong ordinansa nga giduso sa konseho nagtumong sa pagpalambo dili lamang sa pinansyal nga bahin sa mga purok lider apan lakip na usab ang pagpalig-on sa kalidad sa ilang serbisyo sa katawhan ug komunidad.