Gilauman sa Partido Manggagawa nga mahatagan og dakong pagtagad ni Pangulong Ferdinand Marcos Jr. ang mga nag-unang problema sa mga mamumuo sa iyang ikalimang State of the Nation Address o SONA.
Sumala kang kannhi Representative Rene Magtubo, Chairman sa Partido Manggagawa, lima ka dagkong isyu ang ilang gipaabot nga hisgutan sa Pangulo.
Lakip niini ang pagsaka sa unemployment ug pagkaylap sa kontraktwalisasyon, padayon nga pagsaka sa presyo sa mga palaliton nga dili na masabayan sa sweldo sa mga mamumuo, ug ang nagkalapad nga kal-ang tali sa minimum wage ug sa tinuod nga cost of living sa mga pamilyang Pilipino.
Gipaabot usab sa grupo ang paghisgot sa giingong iskandalo sa mga flood control ug uban pang public infrastructure projects, ilabina tungod sa dakong kantidad sa pondo sa gobyerno nga giingong wala hingpit nga napahimuslan alang sa serbisyo publiko.
Gipasiugda usab sa Partido Manggagawa nga nagkagrabe ang kalisod sa daghang pamilyang Pilipino ug wala pa nila mabati ang igo ug epektibong pagtubag sa gobyerno sa mga problema sa sektor sa mga mamumuo.
Tungod niini, gihimo nilang panawagan ang pulong nga “mahiya naman kayo sa manggagawang Pilipino,” isip pagduso sa administrasyon nga mas seryosong tagdon ang kahimtang, panginahanglan ug mga problema sa mga mamumuo sa nasud.