Giunahan sa mga grupo sa mamumuo ang panawagan alang sa uswag sa suholan, kasegurohan sa trabaho, ug pagpanalipod sa katungod sa mga trabahante taliwala sa nagkaduol nga State of the Nation Address (SONA) ni Presidente Ferdinand Marcos Jr.
Sa pakighinabi sa Bombo Radyo Malaybalay kang Atty. Jose Sonny G. Matula, gilauman nilang hisgutan sa Presidente ang ilang giduso nga ₱200 nationwide wage hike aron matabangan ang mga mamumuo, labi na sa mga rehiyon gawas sa Metro Manila nga aduna lamang mubu nga minimum nga suholan.
Gisaway usab ni Matula ang padayon nga labor-only contracting, diin gipabiling kontraktwal ang mga mamumuo bisan nagbuhat og regular nga trabaho. Gidugang usab niini ang kahimtang sa mga delivery rider nga bisan nakadaog na sa labor tribunal, wala pa gihapon napatuman ang mga desisyon alang sa ilang katungod.
Tungod niini, naglaum ang mga lider sa mamumuo nga makipagdayalogo kanila ang Presidente aron direktang matubag ang mga isyung nag-unang nag-apektar sa ilang panginabuhi.