Dili yano nga walkout kondili usa ka hait nga taktika sa pamalaod ang gihimo sa minority senators batok sa giingong tyranny of the majority o pagpangdaog-daog sa mayorya sulod sa Senado—kini ang giluwatang katin-awan karong adlawa ni kanhi Senate President Juan Miguel “Migz” Zubiri atol sa iyang gipahigayon nga press conference ning siyudad sa Malaybalay. Gipatin-aw ni Zubiri nga napugos sila sa paggamit sa maong legislative strategy sama sa quorum call ug pag-adjourn sa sesyon human giingong gipugos sa pikas kampo ang dinalian nga pagboto sa mosyon ni Senador Marcoleta nga nagtugot sa teleconferencing o Zoom participation sa mga senador.
Kusganong misupak si Zubiri sa maong proposal gawas na lang kon duna’y gyera, pandemya, o state of emergency, diin iyang gipasidaan nga kon aprobahan kini, posible umanong mahaw-ang ang hawanan sa plenaryo ug makapahuyang sa tibuok proseso sa paghimo og balaod. Tungod sa maong isyu ug sa nabalaka niyang kagubot, panagsinggit, ug presensya sa mga armado sulod sa Senado nga miresulta pa sa pagpabuto sa usa sa mga guwardiya, opisyal nga gipahayag ni Zubiri nga kinahanglan na ang usa ka reboot o pagbag-o sa liderato.
Sa iyang pagtapos, opisyal nga gipadayag sa senador ang iyang suporta ngadto kang Senador Sherwin Gatchalian isip posibleng mosunod nga lider sa Senado aron maibalik ang dignidad ug kredibilidad sa institusyon. Gihingalan ni Zubiri nga ilang gipili si Gatchalian tungod sa gipakita niining transparency, accountability, ug saktong political will sa pagdumala sa Committee on Finance, ilabina sa pagbusisi sa mga alegadong ghost flood control projects kaniadto.