Napakyas na usab sa pagpakita si Senador Ronald “Bato” Dela Rosa sa pagbalik sa sesyon sa Senado karong Lunes, bisan pa man sa panawagan sa iyang mga kauban nga mobalik na sa trabaho.
Sa pag-abli sa sesyon, 22 lamang ka mga senador ang mitambong diin tanging si Dela Rosa lamang ang wala makita. Sa usa ka ambush interview, gibutyag ni Senate President Vicente “Tito” Sotto III nga wala pa gihapon sila personal nga magka-istorya sa senador sukad kini mahanaw niadtong Nobyembre sa miaging tuig.
Gipahayag usab ni Sotto ang iyang katingala kon giunsa pagpirma ni Dela Rosa sa minority report sa Senate Minority bloc kalabot sa imbestigasyon sa flood control projects, bisan pa man kon wala kini mopakita sa Senado. Matod sa Senate President, wala siyay ideya kon hain na karon ang nahimutangan sa mambabatas.
Kahinumduman nga katapusang nakit-an si Dela Rosa sa Senado niadtong Nobyembre 2025 sa wala pa mobuto ang balita kalabot sa giingong warrant of arrest gikan sa International Criminal Court (ICC) tungod sa iyang papel sa “war on drugs” sa administrasyong Duterte.