Gikwestyon sa mga miyembro sa minorya sa Senado sa giingong pagdali sa deliberasyon sa mosyon ni Senador Rodante Marcoleta nga tugotan ang online voting sa mga senador nga adunay balidong rason sa dili pagtambong sa sesyon.
Misikad ang tensyon sa plenaryo human mangutana si Senador Erwin Tulfo kung adunay tinagong katuyoan sa likod sa maong mosyon, ilabi na human mopagawas og pamahayag ang Office of the Ombudsman nga adunay mga senador nga posibleng kasuhan ug maaresto sa umaabot nga mga adlaw.
Gipasabot ni Tulfo nga basin gihimo ang mosyon aron makabotar gihapon ang mga senador bisan kon ma-detain o mapriso.
Matud pa sa Ombudsman, gikasuhan na og plunder si Senador Jinggoy Estrada tungod sa giingong flood control scam, samtang posibleng kasuhan usab si Senador Joel Villanueva.
Giimbestigahan usab si Senador Rodante Marcoleta sa alegasyong campaign donations, samtang si Senador Ronald “Bato” dela Rosa padayon gihapong gipangita sa mga otoridad tungod sa ICC arrest warrant.
Sa pikas bahin, gibarugan ni Marcoleta nga panahon na nga mag-online voting tungod sa modernong teknolohiya, ug gipakita pa niya nga gitugotan na gani ang online voting sa mga OFW panahon sa eleksyon.
Apan hingpit nga misupak ang minority bloc sa maong proposal.
Matud ni Senador Risa Hontiveros, wala pa matuki ang substance sa mosyon apan gusto na dayon kini ipalusot sa mayorya.
Sumala usab ni Senador Sherwin Gatchalian nga ang teleconference setup gitugotan lamang panahon sa pandemya o national emergency, busa dili angay usbon dayon ang rules sa Senado nga walay lig-ong basehan.
Kahinumduman, ang nahitabo kang kanhing Senadora Leila de Lima, diin gisalikway sa korte ang hangyo nga makatambong siya sa sesyon pinaagi sa online setup samtang naa sa detention.