Gipahugtan sa Impasug-ong Municipal Police Station (MPS) ang seguridad ug pagmonitor sa Atugan Bridge human sa mga natalang insidente sa pagsulay og ambak sa maong tulay.
Sumala kay PCPT Kier Jhon R. Hallasgo, hepe sa Impasug-ong MPS, nagpabilin nga nakadeploy ang mga sakop sa Revitalized Pulis sa Barangay sa amihanan ug habagatang bahin sa tulay, uban sa koordinasyon ug suporta sa mga job order personnel gikan sa lokal nga panggobyerno. Sumala sa kapulisan, duha na ka indibidwal ang ilang naluwas karong tuiga ug gipasa na sa Department of Social Welfare and Development (DSWD) alang sa counseling, samtang usab natala ang usa ka insidente niadtong Agosto 8.
Tungod niini, nanawagan ang kapulisan sa publiko nga mangayo og tabang sa pamilya, higala, o sa mga gitahud nga ahensya kon nag-atubang og bug-at nga suliran ug kaguol, tungod kay ang pagpakamatay dili gayud solusyon sa bisan unsang problema.