Nagpasidaan ang National Grid Corporation of the Philippines (NGCP) bahin sa nipis nga power reserve sa Mindanao Grid, hinungdan nga gipailalom kini sa Yellow Alert tungod sa peligro sa pagkapalong sa kuryente kon mosaka pa ang panginahanglan sa suplay.
Sumala kay NGCP spokesperson Mae Roselle L. Curiano, miabot sa 2,779 megawatts ang available capacity samtang ang peak demand miabot sa 2,689 megawatts, nga nagbilin na lamang og 90 megawatts nga operating margin. Gipasabot ni Curiano nga kinahanglanon kaayo ang reserve aron adunay dali nga makapuli kon adunay generating unit nga kalit nga mo-offline.
Tungod niini, nagpahimangno ang NGCP nga kon adunay power plant nga mapalong o kalit nga mosaka ang paggamit sa kuryente—sama sa pagpaandar sa mga air conditioner ug uban pang appliances—mahimong magdulot kini og mga rotational power interruption sa tibuok rehiyon.