Adunay giandam nga pasilidad ang National Bureau of Investigation (NBI) alang sa kontratistang si Sarah Discaya pananglitan nga tugutan sa korte ang iyang hangyo nga ibalik siya sa kustodiya sa ahensiya.
Matod ni NBI Director Lito Magno, adunay custodial facility ang NBI ug andam sila nga dawaton si Discaya kon mosugot ang korte sa iyang mosyon.
Sumala ni Magno nga ang direktiba o mando lamang sa korte ang ilang sundon ug andam ang NBI nga tipigan siya sa ilang pasilidad.
Dugang pa ni Magno, nga adunay motion nga ilang gisumite alang sa kustodiya sa NBI, apan wala pa’y court order kon kini gitugotan na ug magdepende kini sa mando sa korte.
Niadtong miaging duha ka semana, nagsumite ang kampo ni Discaya og urgent motion nga naghangyo nga ibalhin siya sa NBI detention facility gikan sa kasamtangang presohan sa Lapu-Lapu City Jail.
Gilauman nga pagadesisyunan ang maong mosyon sa Enero 13, 2026, nga mao usab ang petsa sa iyang arraignment kauban ang walo ka opisyal sa Department of Public Works and Highways (DPWH) sa Davao Occidental.
Ang kaso ginadungog sa Lapu-Lapu Regional Trial Court (RTC) Branch 27, may kalabutan sa giingong ghost flood control projects sa Barangay Culaman, Jose Abad Santos, Davao Occidental, nga gipondohan og P96-milyon gikan sa pondo sa gobyerno.