Gidakop sa mga otoridad ang usa ka 50-anyos nga lalaki human kini giingong mipabuto og armas samtang anaa sa impluwensya sa ilimnong makahubog niadtong Abril 19, sa lungsod sa Kibawe, Bukidnon.
Matod pa sa otoridad, nasayran nga dinaliang miresponde ang mga operatiba sa Kibawe Municipal Police Station human makadawat og sumbong labot sa nadunggan nga buto sa armas sa maong dapit. Sa imbestigasyon, nasuta nga nag-inom ang suspek uban sa iyang silingan apan sa dihang nahubog, nag-amok kini ug kalit nga mipabuto sa iyang dala nga armas.
Narekober gikan sa suspek ang usa ka Armscor 9mm pistol nga adunay lima ka buok live cartridges. Mag-atubang karon ang nahisgutan sa kasong illegal discharge of firearm ug paglapas sa Republic Act 10591 o ang Comprehensive Firearms and Ammunition Regulation Act.
Sa pagkakaron, anaa na sa kustodiya sa Kibawe MPS ang suspetsado samtang gihulat ang resulta sa ballistic ug paraffin tests aron mas lig-onon ang kasong ipasaka batok kaniya.