Boluntaryong mitahan sa mga otoridad ang usa ka miyembro sa Militia ng Bayan human sa gipahigayon nga intelligence-driven operation sa lungsod sa Cabanglasan, Bukidnon, niadtong Abril 18.
Giila ang maong indibidwal nga si alyas “Felix,” 38-anyos ug residente sa Barangay Iba sa maong lungsod. Ang pagbalik sa nahisgutan ngadto sa sabakan sa balaod resulta sa koordinasyon sa Mindanao Area Police Intelligence Operations.
Nasayran nga gipaubos na karon sa custodial debriefing ang maong kanhi rebelde samtang gihan-ay na ang mga dokumento aron maapil siya sa Enhanced Comprehensive Local Integration Program (E-CLIP). Pinaagi sa maong programa sa gobyerno, makadawat og tabang pinansyal ug panginabuhian ang nisurender alang sa iyang pormal nga reintegrasyon sa komunidad.
Nagpabilin ang panawagan sa mga awtoridad sa ubang mga miyembro sa rebeldeng grupo nga mosunod sa lakang ni alyas Felix alang sa malinawon nga pagpuyo.