Nitingog na ang aktor ug inhenyero nga si Slater Young human gipasanginlan ang ilang pamilya nga maoy hinungdan sa nahitabong grabeng pagbaha sa Cebu niadtong Nobyembre 4, 2025.
Ang pamilya ni Young mao ang tag-iya sa Monterrazas (Mont Property Group) nga giingong nahimong rason sa dakong baha sa dihang niagi ang bagyong Tino, diin sobra sa 100 ka tawo ang nakalas.
Pinaagi sa usa ka video sa iyang social media account, gihimakak ni Slater nga duna silay kalambigitan sa maong pagbaha. Matod pa niya, wala’y kamatuoran ang mga pasangil ug sa pagkatinuod, nakatabang pa gani ang ilang real estate project aron maminusan ang baha sa maong dapit.
Nagpaabot usab si Slater og pahasubo sa mga pamilya sa mga biktima nga namatay sa maong katalagman. Gipatin-aw usab niya nga ang iyang pagpakahilom kaniadto tungod kay nagpadayon pa ang imbestigasyon bahin sa maong isyu.
Gipasalig ni Young nga andam silang mokooperar sa bisan unsang saktong proseso aron mahatagan og katin-awan ang tinuod nga nahitabo.