Kapin ₱174,080 ang nakumpiska nga kantidad sa gituohang shabu gikan sa usa ka laborer human kini malampusong nadakpan sa gipahigayon nga drug buy-bust operation sa dakbayan sa Valencia niadtong Abril 18.
Giila ang dinakpan nga si alyas Bensoy, 26-anyos ug residente sa Purok 2, Barangay Pinatilan sa maong dakbayan. Atol sa operasyon, narekober sa posisyon sa suspek ang unom ka mga pakete sa gituohang shabu nga motimbang sa 25.6 gramos, lakip na ang usa ka yunit sa motorsiklo, cellular phone, ug ang ₱500 nga buy-bust money.
Ang maong dinakpan temporaryong gikustodiya sa Valencia City Police Station alang sa gikinahanglang dokumentasyon.Giduso na usab sa korte ang kasong kalapasan sa Comprehensive Dangerous Drugs Act of 2002 batok sa maong suspek kinsa mag-atubang na karon sa saktong disposasyon sa balaod.