Taliwala sa padayon nga krisis sa presyo sa lana, nagplano ang pipila ka transport sektor sa Region 10 sa pagduso og usbaw sa pletehan.
Sumala ni Joel Gabatan, ang Regional Coordinator sa National Confederation of Transport Workers’ Union (NCTU), tinguha niini nga himuong P15.00 ang minimum fare alang sa unang upat ka kilometro.
Gawas niini, giduso usab ang dugang nga P1.50 matag mosunod nga kilometro aron dili maalakansi ang mga drayber nunot sa kataas sa presyo sa gasolina.
Gipasabot ni Gabatan nga kung ang usa ka biyahe moabot og pito ka kilometro, adunay dugang nga P4.50 nga ipatong sa minimum fare, hinungdan nga moabot sa kinatibuk-ang P19.50 ang bayad sa pletehan.
Gidugang pa niini nga bisan tuod og mas maayo alang sa mga drayber kon aprobahan ang dugang nga singil sa pletehan, aduna gihapoy kabalaka alang sa mga sumasakay nga maoy direktang maigo sa maong umento.
Gipahayag sa representante sa transportasyon nga ang kasamtangang petisyon alang sa P10.00 nga umento sa flag rate susama sa gipatuman na sa mga taxi, apan gihatagan og gibug-aton nga ang gitinguha lamang sa sektor sa jeepney mao ang makatarunganon nga minimum nga pletehan.
Sa pagkakaron, ang pletehan anaa sa P13.00, ug ang giduso nga dugang pletehan dako og mahimong epekto sa inadlaw-adlaw nga galastuson sa publiko.