Gisalikway ni House prosecutor Chel Diokno ang alegasyon nga usa lamang ka “fishing expedition” ang ilang pagpangayo og subpoena alang sa bank records, tax records, ug AMLC records ni Vice President Sara Duterte.
Matud ni Diokno, adunay lig-on nga basihan ang ilang hangyo tungod sa impormasyon gikan sa Anti-Money Laundering Council (AMLC) nga nahisgutan sa mga pagdungog sa Kamara.
Kini isip tubag ni Diokno human gikwestiyon ni Senator-Judge Alan Peter Cayetano ang katuyoan sa mga subpoena nga gipangayo sa House prosecution.
Sa pikas bahin, gikuwestiyon usab ni Atty. Michael Poa, legal council sa defense team ang mga bank account nga gilista sa hangyo sa prosecution, nga giingong naggikan sa AMLC records.
Matud sa depensa, ang pagpangayo sa tanang bank records ni Vice President Sara Duterte walay klarong pagpasabot kung nganong gikinahanglan ang matag usa niini aron pamatud-an ang mga alegasyon nga anaa sa Articles of Impeachment.