Sa ikatulong pagdungog sa House Committee on Justice, gipresentar sa Anti-Money Laundering Council (AMLC) ang report nga nagpakita sa kabug-aton sa mga bank transactions nga giila nga konektado kang Bise Presidente Sara Duterte ug sa bana niini nga si Atty. Manases Carpio.
Sumala sa AMLC, mokabat sa mga P6.7 bilyon pesos ang total nga covered ug suspicious transactions nga natala sa ilang mga account.
Sa detalye, adunay gibanabana nga 313 ka covered ug 17 ka suspicious transactions sa account sa Bise Presidente, samtang 317 ka covered ug 16 ka suspicious transactions sa bana niini.
Gipakita usab sa report nga ang bahin sa kwarta nga nalambigit diin nagkantidad og P3.77 bilyon pesos para sa Bise Presidente ug P2.99 bilyon pesos kang Carpio, samtang adunay laing P791 milyon pesos nga wala pa matino kung inflow ba o outflow.
Gipasabot sa AMLC ang kalainan sa mga transaksyon diin ang covered transactions mao kadtong molapas sa P500,000 pesos sa usa ka adlaw, samtang ang suspicious transactions mao ang mga lihok sa kwarta nga giisip nga posibleng may kalabotan sa ilegal nga kalihokan base sa assesment sa mga bangko.
Sa hearing, gipunting ni Rep. Joel Chua nga wala kini makita sa SALN ni VP Duterte, samtang sumala ni Rep. Chel Diokno nga dako ang kalahi-an sa deklaradong net worth itandi sa aktuwal nga bank inflows.