Pormal na nga gibasura sa International Criminal Court (ICC) Appeals Chamber ang apela sa kampo ni kanhi Presidente Rodrigo Duterte nga nagkuwestyon sa hurisdiksyon sa international tribunal nga mudumala ug mag-imbestigar sa iyang kaso.
Sa nahitabong pagdungog kagahapong adlawa, Abril 22,2026, gibasa ni ICC Judge Luz del Carmen Ibañez Carranza ang desisyon sa Appeals chamber diin gibasura sa mayoriya sa mga mahistrado ang tanang upat ka grounds of appeal nga gisumite sa kampo sa kanhi presidente.
Matud pa sa huwes, gumikan nga gibasura ang tibuok apela, giisip na usab nga moot o wala nay bisa ang hangyo sa depensa nga buhian ang kanhi presidente gikan sa iyang kaso nga giatubang.
Subay sa Article 82(1)(a) sa ICC Statute, gikumpirma sa mayoriya sa Appeals Chamber ang impugned decision o ang unang desisyon sa korte batok sa kanhi presidente nga nagtugot sa pagpadayon sa proseso.