Tingkagol sa selda ang usa ka 27-anyos nga gikonsiderang High-Value Individual (HVI) human nadakpan sa hiniusang drug buy-bust operation sa mga awtoridad sa Purok 1, Barangay Colonia, Valencia City niadtong Hulyo 27.
Subay sa report ni Bukidnon Police Provincial Office Director PCOL Oliver Sotto Navales ngadto kang Regional Director PBGEN Christopher Nortez Abrahano, nakuhaan ang suspek og siyam ka heat-sealed transparent plastic sachet sa gipanihoang shabu nga motimbang og 80.5 grams ug nagkantidad og ₱547,400.00.
Gawas sa ilegal nga droga, nakumpiska usab gikan sa suspek ang iyang gisakyang motorsiklo, usa ka smartphone, pouch, ug ang ₱1,000.00 buy-bust money.
Ang maong operasyon gipahigayon sa hiniusang pwersa sa Provincial Drug Enforcement Unit (PDEU), Valencia City Police Station, 2nd PMFC, Provincial Intelligence Unit (PIU), ug CADSUT.
Sa kasamtangan, gipasa na sa Bukidnon Provincial Forensic Unit ang mga nakumpiskang ebidensya alang sa laboratory examination, samtang giandam na ang kasong paglapas sa Republic Act 9165 o Comprehensive Dangerous Drugs Act of 2002 batok sa suspek.