DANGCAGAN, BUKIDNON — Tingkagol sa selda ang usa ka 27-anyos nga giilang Street Level Individual human nadakpan sa hiniusang drug buy-bust operation sa mga awtoridad sa Purok 9, Barangay Miaray, Dangcagan, Bukidnon niadtong Hulyo 26.
Subay sa report ni Bukidnon Police Provincial Office Director PCOL Oliver Sotto Navales ngadto kang Regional Director PBGEN Christopher Nortez Abrahano, giila ang nadakpang suspek nga si Alyas “Ton-ton”.
Nakuhaan ang suspek og duha ka heat-sealed transparent plastic sachet sa gipanihoang shabu nga nagtimbang og 5.28 grams ug nagkantidad og ₱35,904.00. Gawas sa ilegal nga droga, nakumpiska usab gikan kaniya ang usa ka motorsiklo, cellphone, helmet, ug ang ₱1,000.00 buy-bust money.
Ang maong operasyon gipahigayon sa hiniusang pwersa sa Dangcagan Municipal Police Station, 2nd Bukidnon PMFC, Provincial Intelligence Unit, ug 1003rd RMFB 10.
Sa kasamtangan, gipasa na ang mga nakumpiskang ebidensya sa Bukidnon Provincial Forensic Unit alang sa laboratory examination, samtang yano nang giandam ang kasong paglapas sa Republic Act 9165 o Comprehensive Dangerous Drugs Act of 2002 batok sa suspek.