Landing sa balay tambalanan ang duha ka lalaki human nagtinigbasay tungod lamang sa lalis bahin sa mga baboy nga nakaguba sa pananom nga utanon sa Purok 4, Barangay Silo-o, Malitbog, Bukidnon niadtong Hulyo 27 sa gabi-on.
Subay sa report gikan sa Malitbog Municipal Police Station, giila ang biktima nga si Alyas “Mario”, 32-anyos, samtang ang suspek giila nga si Alyas “Berting”, 37-anyos, nga pulos mga residente sa maong dapit.
Gipakita sa imbestigasyon nga ang biktima nga si Alyas “Mario”, nga gituohang nakainom, nakiglalis sa suspek nga si Alyas “Berting” human gipangita niini ang katin-awan bahin sa mga baboy nga nakaguba sa iyang utanan. Sa tunga-tunga sa ilang lalis, gibunlot sa suspek ang iyang sundang ug gitigbas ang biktima sa wala nga abaga.
Apan nakabalos ang biktima—napauli kini sa ilang balay, nakakuha og sanggot, ug gitigbas usab sa nawong ang suspek nga si Alyas “Berting”.
Tungod sa mga samad nga naangkon sa usag usa, dinalian silang gidala sa Malitbog Hospital ug sa ulahi gi-transfer sa Northern Mindanao Medical Center (NMMC) sa Cagayan de Oro City alang sa operasyon, samtang nagpadayon pa ang imbestigasyon sa kapolisan alang sa ipasakang kaso.