Usa ka dakong dungog ug pasigarbo alang sa komunidad sa mga Pilipino matapos napili ang Fil-Am singer nga si Nicole Scherzinger ug ang comedian nga si Jo Koy nga makadawat og ilang kaugalingong bituon sa sikat nga Hollywood Walk of Fame alang sa Class of 2027.
Nalakip ang duha sa kategoryang Live Theatre / Live Performance kauban ang 32 pa ka mga bantogang personalidad sa pelikula, musika, ug teatro nga pormal nga gipahibalo sa Hollywood Chamber of Commerce.
Subay sa Walk of Fame Selection Committee, gihatag ang maong prestihiyosong pagkilala tungod sa ilang talagsaong talento, kontribusyon sa industriya, ug dako nga impluwensya sa ilang mga fans sa tibuok kalibotan.
Pinaagi sa ilang social media accounts, nagpadayag sa ilang dakong pasalamat sila si Nicole ug Jo Koy diin gihulagway nila ang maong dungog nga usa ka “dream come true” ug garbo sa matag Pilipino.