Nag-viral sa social media ang usa ka lalaki sa Arkansas, Estados Unidos human kini nitabang sa usa ka PWD nga naka-wheelchair sa pagtabok sa busy nga karsada — samtang nagsul-ob og Spider-Man costume.
Sa gi-post nga traffic camera video sa Jonesboro Police Department, makita ang PWD nga naglisod sa pagtabok taliwala sa padayong paglabay sa mga sakyanan. Apan sa dihang nag-pula ang suga sa trapiko, dali nga ninaog sa iyang awto ang lalaki nga giilang si Christopher Hellenthal aron tabangan kini hangtod nga luwas nga nakatabok sa pikas bahin sa dalan.
Gisaysay ni Hellenthal nga naka-costume siya tungod sa “Superhero Day” sa iyang trabahoan, ug wala siya nagduha-duha sa pagtabok tungod kay nakita niyang labing nanginahanglan ang maong tawo. Wala usab kini magdahom nga makadawat og liboan ka mga pagdayeg gikan sa mga netizens sa social media.
Naglaom ang maong lalaki nga magsilbing inspirasyon ang iyang gihimo nga ang tinuod nga pagka-bayani dili kinahanglang maghulat og kamera o magsul-ob og costume, kundi ang kinasingkasing nga pagtabang sa isigkatawo.