Padayon ang kampanya sa internal cleansing sa Police Regional Office 10 aron mapalig-on ang disiplina sa mga sakop ug mapadayon ang integridad sa kapulisan.
Sa eksklusibong pakighinabi sa Bombo Radyo Malaybalay kang PBGen. Cristopher N. Abrahano, Regional Director sa PRO-10, gibutyag niini nga gipanghingusgan karon sa ilang buhatan ang pag-review sa mga kaso sa mga personahe sa kapulisan aron masiguro nga mapanubagon ang mga nakalapas sa balaod ug mapatuman ang hustong silot.
Nunot niini, gimando usab ni Abrahano nga ang sa tanan nga lebel sa command ang pag-exercise sa ilang disciplinary authority, diin gipangayo niini sa mga provincial ug city directors nga ipakita sa aktwal nga datos ang resulta sa ilang internal cleansing pinaagi sa mga nasilotang personnel.
Gilauman sa Regional Director, nga sa mosunod nga mga bulan, makita ang konkreto nga epekto niini isip pundasyon sa usa ka limpyo ug matinud-anon nga organisasyon.
Apan matud pa ni Abrahano, mas maayo ang performance sa Northern Mindanao Police kung itandi sa ubang rehiyon, labi na sa aspeto sa crime prevention.
Gitutokan niini ang pagpugong sa mga krimen nga naglakip sa weapons ug firearms violations.
Lakip usab nga gitutokan ang smuggling sa mga sigarilyo, ug ang pagpatuman sa no-take policy.
Dugang pa, gipasabot niini nga kabahin sa estratehiya ang aktibong engagement sa publiko aron mapakita ang tinuoray nga tinguha sa kapulisan sa pagserbisyo.
Gitutokan usab sa PRO-10 ang pagpaubos sa focus crimes index, apan padayon gihapon nga gituki ang ubang kaso nga nagpabilin sa taas nga kriminalidad aron kini usab mahatagan og pagtagad.
Matud usab ni Abrahano, padayon ang pagmonitor ug pagpangita og solusyon alang sa epektibong counter-insurgency aron magpabilin nga luwas ug malinawon ang mga lugar nga giideklarang insurgency-free.
Gidasig usab niini, ang mga lokal nga opisyal sa Bukidnon ug sa ubang probinsya sa Rehiyon-10 nga ipadayon ang momentum pinaagi sa aktibong pagpatuman sa Integrated Military and Law Enforcement Operations, Retooled Community Support Program (RCSP), Revitalized Pulis sa Barangay ug uban pang programa, nga nagpalig-on sa presensya ug partisipasyon sa kapulisan sa matag komunidad.