Tingkagol sa selda ang usa ka 26-anyos nga lalaki human kini masakpi sa aktong pagpangawat og himongaan nga manok didto sa Polinar Village, Barangay Poblacion, Valencia City, alas 4:30 sa kaadlawon niadtong Martes, Hunyo 9.
Subay sa imbestigasyon, giguba sa suspek ang tangkal aron kawaton ang maong manok nga gipanag-iya sa usa ka 40-anyos nga residente. Nabulabog ang maong kawat human makamatikod ang usa ka silingan nga daling misinggit og “kawatan!”, hinungdan nga daling milihok ang mga residente ug gipalibotan ang suspek aron dili makasutoy og dagan.
Gikumpirma sa kapulisan nga ubos pa sa impluwensya sa makahubog nga ilimnon ang dinakpan sa dihang gihimo ang pagpangawat. Sa kasamtangan, anaa na sa kustodiya sa Valencia City Police Station ang suspek alang sa saktong dokumentasyon.