Miklaro ang kapolisan sa lalawigan sa Aurora nga walay bisan unsang matang sa pabigat o karga nga nakatali sa lawas sa duha ka magdudula sa basketball sa Ateneo de Manila University nga silang Rene Baterbonia ug Divine Adili sa dihang nalunod sila didto sa Dipaculao, Aurora.
Sumala sa report, gihimo sa Aurora Police ang maong pagpatin-aw dungan sa mga nanggawas nga hungihong ug espekulasyon sa social media nga matod pa gipabug-atan ang mga atleta atol sa ilang team-building activity. Gawas nga walay nakitang pabigat, gipahayag usab sa mga awtoridad nga wala sila’y nakitang bun-og sa lawas sa mga biktima ug dako ang ilang pagtuo nga ang kusog nga balod ug sulog sa dagat ang nag-unang hinungdan sa trahedya.
Sa pagkakaron, nagpadayon pa ang lawom nga imbestigasyon sa Philippine National Police (PNP) aron hingpit nga masuta ang tibuok detalye sa insidente ug kon aduna ba’y nahitabong pagpabaya sa maong kalihokan.