Nasikop sa gilusad nga buy-bust operation sa Purok 14, Brgy. Laligan, Valencia City, Bukidnon kagahapong adlawa, Hunyo 12 ang giila nga Top 1 High-Value Individual (HVI) sa PNP-PDEA Provincial Target List.
Giila ang suspek nga si alyas “Raffy,” 37-anyos, ug residente sa nahisgutang dapit.
Gihimo ang operasyon sa hiniusang pwersa sa Valencia City Police Station, RPDEU 10, PDEA Bukidnon, 1003rd MC RMFB 10, CADSUT, ug PIU Bukidnon PPO.
Nakuha gikan sa posisyon sa suspek ang gituohang shabu nga may gibug-aton nga 6.1 gramo, nga gibana-banang mokantidad og ₱41,480 base sa Standard Drug Price.
Nasakmit usab sa mga otoridad ang gigamit nga buy-bust money, usa ka cellphone, ug uban pang mga drug-related paraphernalia. Sa pagkakaron, ang suspek anaa na sa kustodiya sa Valencia City Police Station alang sa tukmang disposisyon ug pagpasaka og kaso batok kaniya.