Gipasalig sa Police Regional Office-10 (PRO-10) nga nagpabiling luwas ug hapsay ang tibuok Northern Mindanao taliwala sa nagpadayong implementasyon sa Summer Vacation (SUMVAC) 2026.
Sa gihimo nga pamahayag ni Police Major Joann G. Navarro, ang tigpamaba sa PRO-10, gikumpirma niini nga walay natala nga bisan unsang dili maayong insidente, ilabi na diha sa mga nagkadaiyang sikat nga tourist destinations sa rehiyon.
Gidugang pa ni PMaj. Navarro nga walay lokal o langyaw nga turista ang nabiktima sa bisan unsang matang sa krimen.
Bisan pa man niini, magpadayon gihapon ang ilang hugot nga pagpabantay pinaagi sa pag-deploy sa mga tourist police sa mga dapit diin magtapok ang mga tawo, dungan sa pagpatuman sa mga kampanya alang sa public awareness ug information dissemination aron masiguro ang kaluwasan sa tanan.
Dugang pa, giklaro usab sa opisyal nga walay angay nga ika-alarma ang publiko dungan sa pagbutyag nga nagpadayon pa gani ang pagkunhod sa ihap sa kriminalidad sa kasamtangan. Matud pa niini, base sa ilang gihimong pagsusi sa crime statistics sa tibuok Amihanang Mindanao, nagpakita kini og positibong resulta kung itandi sa susamang panahon sa milabayng tuig tuig.