Misaka na ngadto sa ₱2,900 hangtod ₱3,000 ang presyo sa matag sako sa bugas sa lalawigan sa Bukidnon gikan sa kanhi ₱2,400. Kini human namatikdan sa Department of Agriculture (DA) ang pagsaka sa buying price sa humay dungan sa panahon sa ting-ani, sumala ni Board Member Atty. Oliver Owen Garcia.
Gipadayag ni Garcia atol sa 36th Regular Session sa Sangguniang Panlalawigan sa Bukidnon nga duna’y posibilidad nga mosunod pa ang dugang pagsaka sa presyo sa bugas tungod sa taas nga presyo sa palit sa humay nga maoy kasagarang basehan sa merkado human sa harvest season. Dugang niya, klaro na ang paglihok sa presyo sa bugas sa mga nagkadaiyang tindahan ug merkado sa tibuok lalawigan.
Sa pikas bahin, gitaho sa Department of Trade and Industry (DTI) nga wala pa’y kausaban sa presyo sa mga manufactured basic commodities base sa ilang gihimong inspeksyon niadtong Marso 19. Apan, giangkon sa buhatan nga nakadawat na sila og pahibalo gikan sa mga manufacturers mahitungod sa posibleng price escalation o pagsaka sa presyo sugod karong buwan sa Abril, ilabina sa mga de-lata ug uban pang processed goods.
Tungod niini, padayon ang hugot nga pag-monitor sa DA, Provincial Veterinary Office (PVO), ug DTI sa presyo sa humay, bugas, utanon, karne, itlog, ug uban pang batakang palaliton aron masiguro nga maprotektahan ang mga konsumidor batok sa dili makatarunganon nga pagsaka sa presyo sa merkado.