Sikop ang usa ka lalaki nga giingong misulay sa pagpangawat human kini nadakpan nga malinawong naligo sulod sa banyo sa panimalay nga iyang gisudlan sa Barangay San Vicente, Tarlac City, pasado alas-5:00 sa kaadlawon.
Sumala kang Barangay Kagawad Roger Liquiran, nakamata ang tag-iya sa balay human makadungog og katingad-an nga kasaba gikan sa ilang banyo. Sa iyang pagsusi, nakurat kini pagkakita sa usa ka wala mailhing lalaki nga nag-enjoy pa sa pagkaligo sulod sa ilang kasilyas.
Aron dili makasibat, madiskarteng gisirad-an ug gi-lock sa tag-iya ang pultahan sa banyo ug dinalian nga nangayo og tabang sa mga opisyal sa barangay, hinungdan nga naabtan pa sa mga otoridad ang suspek sulod sa kasilyas. Gituohang nakasulod ang lalaki pinaagi sa pag-abli sa roll-up door ug nagtuo nga walay tawo sa sulod, hinungdan nga midesisyon kining manglimpyo una sa lawas sa dili pa unta ipadayon ang planong pagpangawat.