Naangol ang drayber sa usa ka motorsiklo human kini mabanggaan sa usa ka pick up truck ug mapasok sa kasukwahi nga lane sa National Highway, Barangay Bongbongon, Quezon, Bukidnon kaniadtong milabay’ng adlaw.
Sumala sa kapulisan kalit nga niliko pawala ang pick up nga wala makasiguro nga luwas ang dalan, hinungdan nga nabanggaan niini ang motorsiklo.
Tungod sa impact, nawad-an og kontrol ang motorsiklo ug misulod sa kasukwahi nga lane diin nabanggaan kini usab sa wing van.
Human sa insidente, mibiya sa lugar ang pick up ug midagan padulong sa wala matino nga direksyon, samtang ang drayber sa motorsiklo nakaangkon og seryosong samad ug gidala sa Quezon Health Center Infirmary alang sa pagtambal.
Padayon ang imbestigasyon sa kapulisan aron mailhan ug madakpan ang responsable.